日本關西最大商場：大阪LALAPORT EXPOCITY  

如果講到大阪最好玩嘅地方，就一定唔可以錯過大阪LALAPORT EXPOCITY！大阪LALAPORT EXPOCITY 喺大阪萬博公園隔離，非常方便。入面有過百間店舖畀你慢慢行，無論係生活精品、各大品牌、男女服裝定係小朋友嘅用品都有，最重要係只要買夠一定嘅金額，就會有 10% 嘅免稅添，好抵！

除咗掃貨之外，大阪LALAPORT EXPOCITY  仲有全日本最高嘅摩天輪，轉一個圈需時 18 分鐘，可以欣賞到成個大阪嘅景色。有小朋友的話仲可以帶佢哋去 Nifrel 海遊館水族館一次過玩埋，咁就唔使怕佢哋悶喇！

平價藥妝集中地：心齋橋購物大道 

嚟到大阪一定要去心齋橋！心齋橋貼 JR 難波站好近，大概行 7 分鐘就會到達，入面嘅店舖簡直係行足成日都行唔完！想行國際品牌的話有 H&M、UNIQLO、ZARA、GAP、ABC MART，鍾意日本本土品牌就可以行下 BEAUTY & YOUTH、C-PLA、ROPE PICNIC、RANDA，就連大百貨公司都有好多間：百貨公司大丸心齋橋店（總店）、SOGO心齋橋總店、東急Hands心齋橋店、心齋橋PARCO，真係行行下就會唔覺意買勁多嘢！

至於女仔最愛嘅藥妝產品，心齋橋都有齊松本清、大國藥妝、Kokumin、Os drug、サンドラッグ咁多間店，大家有時間的話不妨行多兩間格下價，同埋記得睇清楚有冇得退稅啊！

銅板人氣掃街：道頓堀美食

嚟到大阪邊度有齊最人氣嘅小食？緊係要嚟道頓堀啦！見到超大嘅固力果立牌，就知你冇去錯地方喇，入面有章魚燒、大阪燒、拉麵名店、燒肉、炸物等等，所有美食都應有盡有！

想食章魚燒的話，有大阪最好食嘅章魚燒君、章魚燒道樂WANAKA、本家章魚燒、赤鬼章魚燒、會津屋、くくる章魚燒；想試大阪燒，就有一明大阪燒、美津の大阪燒、千房大阪燒；拉麵選擇仲多，可以試花丸軒拉麵、三豐麵、四天王拉麵、一蘭拉麵、神座拉麵、 金龍拉麵，除此之外仲有其他名店，好似係PABLO 、大起水產迴轉壽司、あぶりや國產牛燒肉吃到飽、牛かつもと村 炸牛排等等，全部都係平價又好食！